Gazteria

Itsasondok beti izan du ardura handia herriko haur gazte eta nerabeekin. Ekimen asko egin izan dira, garrantzitsuenetakoa 2015 inguruan eman zen, Itsasondo haurren herria batzordea sortu zen. Aldaketak izan ditu urte hauetan eta orain gazteria foro gisa lan egiten du. Bertan biltzen dira eskola, guraso elkartea, gaztelekuko hezitzaileak eta ongizateko kideak. Modu integral batean, gazteri alorra lantzeko borondatez aritzen dira lanean.

2018. urtean foro horrek prozesu bat abiatu zuen, eta, hausnarketa ondoren, hiru printzipio zehaztu ziren. Etorkizunean gure lana definituko duen ardatza izango dira printzipio horiek.

• Guztion herria.
• Herri identitatea.
• Herritik herriarentzat.

Aldundiko Gaztematika komunitateko kide gara, eta 2021. urtean Oinherri herri hezitzaile sareko kide egin ginen.

Printzipio horiek lantzeko asmoz, erabaki zen ekintza plan dinamikoa garatzeko hezitzaile lantaldea kontratatzea 2021ean, eta prozesua martxan jarri zen. Hezitzaile horiek, urtean zehar herriko ekintzak dinamizatzeaz gain, gaztelekua kudeatuko dute.

Beren lehen zeregina izan da herriko nerabeekin parte-hartze prozesua bat egitea (2021eko maiatza-ekaina), haien nahi eta beharrak jasotzeko eta bereziki herritik herriarentzat printzipio landu nahian egin da prozesu hori.

Udaleku irekietako begiraleak ere hezitzaile berberak izan dira, eta 2021. urtean, lehen aldiz, kontratazio zuzenarekin egin dira udalekuak. Orain arte, guraso elkarteak egin du kontratazioa, elkarte batekin, baina, aurrerantzean, guraso elkartearekin lankidetzan, udaletik kudeatuko dira udaleku irekiak.

Udalekuetan lanean arituko diren begiraleak herrikoak bertakoak izateko apustua ere egin du udalak, eta %75ean finatzatuko du 2021-2022 ikasturteko begirale ikastaroa.

-

Informazio zehatzagoa nahi izanez gero: gazteria-kultura@itsasondo.eus